Një 62-vjeçar italian, Corrado Brin, do të gjykohet më 4 mars 2027 nga gjykata kolegjiale e Perugias, i akuzuar për kërcënime të rënda dhe shpifje të rënduar ndaj Silvia Albano, gjyqtare e seksionit të emigracionit në Gjykatën Civile të Romës.
Silvia Albano vendosi që 12 emigrantët të ktheheshin në Itali, pasi nuk u plotësuan kushtet ligjore për mbajtjen e tyre në qendrën shqiptare. Vendimi pengoi zbatimin e planit të qeverisë së Giorgia Melonit për këtë grup emigrantësh
Sipas akuzës, pas vendimit të marrë në tetor 2024 lidhur me qendrat e riatdhesimit të emigrantëve në Shqipëri, Brin i kishte dërguar gjyqtares tri email-e brenda pak ditësh, me fyerje dhe kërcënime me vdekje.
Ndër mesazhet e pretenduara në dosjen e çështjes ishin: “Shpresoj që dikush të të qëllojë shumë shpejt, do të jetë një ditë feste” dhe “Magjistratët përmbysës dhe puçistë duhet të ndalen me plumb për të shpëtuar demokracinë”.
62-vjeçarit, i cili përshkruhet si aktivist i ekstremit të djathtë, i është njoftuar thirrja e drejtpërdrejtë për gjykim.
Brin, i mbrojtur nga avokati Cristiano Mancuso, ishte përmendur edhe më parë në mediat lokale. Ai kishte hyrë me forcë në stadiumin e ekipit Cairese, që mban emrin e babait të tij, Cesare Brin, dhe kishte shkatërruar dhomat e zhveshjes. Në atë kohë, ai e kishte justifikuar veprimin si protestë ndaj faktit se në fushë po luante një ekip i përbërë nga të rinj emigrantë.
