Një thikë artizanale është zbuluar në burgun e Fierit, ndërsa dyshohet se do të përdorej për vrasjen e të dënuarit Denis Bajri, alias Brajoviç.
Sipas dëshmisë së dhënë prej tij para hetuesve, tentativa për vrasje ishte e organizuar nga jashtë ambienteve të burgut. Bajri ka pretenduar se pas sulmit qëndronte Ibrahim Lici, kundërshtari i tij i njohur, i cili sipas tij kishte dhënë porosinë për eliminimin e tij.
Në dëshminë e tij, Bajri ka treguar se Aldo Gjini kishte kërkuar ta takonte në qeli dhe kishte shkuar së bashku me Jurgen Zotajn. Sipas tij, Zotaj i kishte dhënë një telefon, në të cilin ishte në linjë Ibrahim Lici.
“Jeta jote kaq e pat”, mësohet të ketë thënë Lici, sipas deklarimit të Bajrit. Menjëherë pas kësaj, ai pretendon se Zotaj tentoi ta sulmonte me thikë.
Denis Bajri është një prej emrave të përfshirë në dosjet e krimit të organizuar në Shkodër. Ai është akuzuar për përfshirje në vrasjen e Gjin Ndojit, alias Boriçi, ngjarje e ndodhur në vitin 2020, ndërsa emri i tij është përmendur edhe në kuadër të hetimeve të operacionit “Metamorfoza”.
Në anën tjetër, Ibrahim Lici është prej vitesh në konflikt me grupin Bajri. Përplasja mes dy palëve lidhet me një seri ngjarjesh të rënda kriminale në Shkodër, përfshirë vrasje dhe atentate.
Një prej episodeve të lidhura me këtë konflikt është vrasja e Boran Bërçanës, për të cilën krahu Bajri dyshonte Ibrahim Licin. Më pas, vrasja e Fatbardh Licit, xhaxhait të Ibrahim Licit, e përshkallëzoi më tej përplasjen mes dy grupeve.
Tashmë, zbulimi i thikës në burgun e Fierit dhe dëshmia e Denis Bajrit kanë rikthyer në vëmendje konfliktin e vjetër mes dy grupeve, ndërsa hetimet pritet të përcaktojnë nëse pas tentativës për vrasje ka pasur një plan të organizuar dhe kush qëndron pas tij.
