Kapiteni i Kombëtares shqiptare, Berat Gjimshiti, ka kërkuar përqendrim maksimal nga kuqezinjtë përpara transfertës ndaj San Marinos, duke paralajmëruar se diferencat në letër nuk duhet ta bëjnë skuadrën të nënvlerësojë kundërshtarin.
Në konferencën për shtyp para takimit, mbrojtësi i Atalantës theksoi se mënyra se si Shqipëria do t’i qaset ndeshjes mund të përcaktojë edhe vështirësinë e saj.
“Nuk është e thjeshtë. Përqendrimi duhet të jetë 100% në çdo ndeshje, sidomos në këto sfida ku pritet që ne të kemi kontrollin e lojës. Shumica besojnë se do të jetë një ndeshje e thjeshtë, por nuk do të jetë aspak kështu. Varet nga ne nëse do ta bëjmë të thjeshtë apo jo”, deklaroi Gjimshiti.
Kapiteni u ndal edhe te momenti që po kalon Kombëtarja. Pas një periudhe me rezultate negative, ai beson se fitorja në ndeshjen e fundit mund të shërbejë si pikënisje për objektivat e radhës.
“Kishim shumë humbje dhe nuk ishte një periudhë e mirë. Tani jemi rikthyer tek këto ndeshje shumë të rëndësishme. Liga e Kombeve na jep një mundësi për Europianin. Hapi i parë ishte ndeshja e fundit, ku zhvilluam një paraqitje të mirë dhe fituam me meritë. Synimet janë të mëdha, duam vendin e parë”, u shpreh ai.
Sipas Gjimshitit, Shqipëria duhet të luajë me intensitet të lartë gjatë gjithë takimit, ndërsa kontributi nuk duhet të vijë vetëm nga titullarët. Edhe futbollistët që aktivizohen gjatë ndeshjes mund të rezultojnë vendimtarë.
“Duhet të jemi gati 100%. Me agresivitetin dhe cilësinë që kemi, do t’ia dalim së bashku. Duhet të jemi 11 lojtarë në fushë, ndërsa ata që vijnë nga pankina do të jenë shumë të rëndësishëm. Kjo duhet të jetë forca jonë”, shtoi kapiteni.
Një moment më i veçantë i konferencës lidhej me interesin për bileta. Gjimshiti tregoi se këtë herë vetëm një person i kishte kërkuar një të tillë, një mik rumun me të cilin kishte luajtur më parë në Itali.
Në fund, mbrojtësi kuqezi foli edhe për një nga lojtarët e San Marinos që njeh nga përballjet e mëparshme, duke evidentuar forcën e tij fizike dhe aftësinë për të mbajtur topin.
“E njoh sulmuesin, besoj se quhet Nani. Kam luajtur kundër tij. Fizikisht është i fortë, rreth 1.90 metra si unë dhe e mban shumë mirë topin. Nuk është e thjeshtë të luash kundër tyre. Duhet të jesh 100% i fokusuar, sepse në futboll mund të ndodhë çdo gjë”, përfundoi Gjimshiti.
