Një operacion i gjerë ndërkombëtar kundër krimit të organizuar ka përfunduar me 334 persona të arrestuar dhe sekuestrimin e më shumë se 7,4 tonëve kokainë në 26 vende.
Operacioni “Joint Action Days Mobile 9”, i zhvilluar nga 28 shtatori deri më 9 tetor, u mbështet nga Interpoli dhe përfshiu kontrolle e veprime të koordinuara kundër trafikut të drogës, kontrabandës dhe vjedhjes së automjeteve.
Sipas bilancit të publikuar, autoritetet sekuestruan gjithashtu 710 automjete të vjedhura, mbi 10 milionë cigare kontrabandë dhe 80 armë zjarri.
Shqipëria dhe Kosova renditen mes vendeve pjesëmarrëse në aksion, në kuadër të bashkëpunimit ndërkombëtar për luftën kundër rrjeteve kriminale që veprojnë përtej kufijve shtetërorë.
Megjithatë, raportimi nuk specifikon nëse mes 334 personave të arrestuar ka shtetas shqiptarë apo kosovarë. Pjesëmarrja e vendeve në operacion nuk nënkupton përfshirjen e shtetasve të tyre në veprimtaritë kriminale të zbuluara.
