Më shumë se 300 emigrantë nga Kurdistani Irakian, që synonin të arrinin në Europë dhe më pas në Mbretërinë e Bashkuar, dyshohet se janë rrëmbyer, torturuar dhe mbajtur peng nga një grup milicie në Libi. Sipas një hetimi ndërkombëtar, familjeve të viktimave u kërkohej të paguanin deri në 5 mijë dollarë për lirimin e tyre, ndërsa në rast refuzimi kërcënoheshin se të afërmve do t’u hiqej një veshkë.
Të mbijetuarit kanë rrëfyer muaj të tërë robërie në kushte çnjerëzore, me dhunë, uri dhe mbipopullim ekstrem. Disa familje kanë paraqitur fotografi me plagë që dyshohet se mund të lidhen me ndërhyrje kirurgjikale, megjithëse autoritetet nuk kanë konfirmuar zyrtarisht raste të heqjes së organeve.
Mbi 100 persona janë riatdhesuar në Kurdistanin Irakian, ndërsa hetimet për rrjetet e trafikimit dhe rolin e grupeve të armatosura në Libi vijojnë. Rasti ka rikthyer vëmendjen mbi rreziqet e emigracionit të paligjshëm dhe aktivitetin e organizatave kriminale që operojnë përgjatë rrugëve migratore drejt Europës.
