Takimi pas urdhrit për shkarkime masive në administratë
Kryeministri Edi Rama ka mbledhur këtë të premte ministrat e kabinetit qeveritar dhe drejtuesit politikë të Partisë Socialiste në Vilën e Kuqe, në ambientet e Pallatit të Brigadave në Tiranë.
Takimi zhvillohet në një moment tensionesh të forta politike, ndërsa protestat studentore vijojnë me kërkesën për dorëheqjen e kryeministrit.
Mbledhja vjen vetëm 24 orë pas urdhrit të Ramës për nisjen e një vale shkarkimesh në administratën shtetërore, që prek drejtuesit e institucioneve dhe agjencive në varësi të ministrive.
Sipas informacioneve të raportuara, zhvillimet kanë marrë hov pas vizitës së kryeministrit në Mal të Zi, ku një ditë më parë është takuar me kancelarin gjerman Friedrich Merz.
Pas këtij takimi, Rama raportohet se ka dhënë përmes telefonit udhëzime për shkarkimin e drejtorëve të përgjithshëm në ministri dhe institucionet e varësisë. Megjithatë, nuk ka ende një konfirmim zyrtar se urdhri përfshin të gjithë drejtuesit pa përjashtim.
Çfarë po ndodh në administratën shtetërore dhe cili është qëllimi i kësaj lëvizjeje të menjëhershme?
Mbledhja e sotme në Vilën e Kuqe ngre pikëpyetje mbi ndryshimet që mund të pasojnë në nivelet drejtuese të institucioneve shtetërore, pikërisht në një kohë kur qeveria përballet me presionin e protestave dhe kërkesat për përgjegjësi politike.
Ende nuk është bërë publike axhenda e plotë e takimit dhe as nëse në përfundim të tij do të njoftohen vendime të reja për administratën apo kabinetin qeveritar.
