Një 22-vjeçar shqiptar, i identifikuar si Arber S., është dënuar me 3 vite e gjysmë burg nga Gjykata e Oxfordit në Britaninë e Madhe, pasi u shpall fajtor për përfshirjen në një sulm të dhunshëm ndaj një personi jashtë një lokali.
Ngjarja e rëndë ndodhi në orët e para të 1 janarit 2026, në zonën Cowley Road, pranë lokaleve Cafe Baba dhe Bodrum, ku një grup personash sulmuan brutalisht një burrë, duke e goditur vazhdimisht me grushte dhe shkelma.
Viktima, i identifikuar si Wesley Rangel Da Silva, pësoi dëmtime në fytyrë dhe dhëmbë, si pasojë e dhunës së ushtruar ndaj tij.
E rrëzuan në tokë dhe e goditën me shkelma në kokë
Nga hetimet dhe provat e paraqitura gjatë procesit gjyqësor rezultoi se 22-vjeçari shqiptar ishte pjesë e grupit që sulmoi viktimën jashtë lokalit.
Gjatë përplasjes, Da Silva u rrëzua në tokë, ndërsa agresorët vijuan ta godisnin me grushte dhe shkelma në pjesë të ndryshme të trupit, kryesisht në kokë dhe fytyrë.
Sulmi i shkaktoi viktimës dëmtime në dhëmbë dhe ënjtje të fytyrës.
Ngjarja u bë objekt i një hetimi penal, i cili përfundoi me identifikimin dhe ndjekjen penale të personave të përfshirë.
Kishte emigruar në Angli për një jetë më të mirë
Gjatë seancës gjyqësore u zbuluan edhe detaje nga jeta e 22-vjeçarit shqiptar.
Arber S., kishte mbërritur në Britaninë e Madhe rreth pesë vite më parë, me synimin për të ndërtuar një jetë më të mirë.
Ai kishte punuar në sektorin e ndërtimit dhe nuk rezultonte të kishte dënime të mëparshme penale.
Këto rrethana u morën në konsideratë nga gjykata gjatë caktimit të dënimit, por nuk u konsideruan të mjaftueshme për të shmangur burgimin, duke marrë parasysh rëndësinë e sulmit dhe dëmtimet e shkaktuara viktimës.
Më 23 tetor 2026, Gjykata e Oxfordit vendosi dënimin e tij me 3 vite e 6 muaj burg.
Dy të tjerë presin dënimin, një i përfshirë është dënuar më parë
Në të njëjtën çështje penale janë përfshirë edhe persona të tjerë.
Orgito Sh., dhe Oltian N., pritet të paraqiten përpara gjykatës më 30 tetor 2026, kur është planifikuar shpallja e vendimeve përkatëse.
Ndërkohë, Arger P.,, një tjetër person i përfshirë në ngjarje, është dënuar më herët me nëntë muaj burg.
Vendimi ndaj Arbërit shënon një tjetër zhvillim në procesin gjyqësor për sulmin e dhunshëm të ndodhur natën e Vitit të Ri në Oxford, ndërsa procedurat ndaj personave të tjerë vijojnë.
