SPAK urdhëroi këtë të hënë kontrolle në Tiranë dhe Vlorë, në kuadër të hetimeve që po zhvillon për dyshimet për tjetërsim pronash në Zvërnec, zonë ku ka pasur edhe protesta kundër ndërtimit të një resorti luksoz.
Ndër emrat për të cilët Prokuroria e Posaçme ka urdhëruar kontrolle është edhe biznesmeni Redi Struga. Ai është inxhinier dhe administrator i kompanisë projektuese “InfraKonsult” sh.p.k. Kompania e Strugës i ka blerë pronat nga zotërues të tjerë.
Struga, përmes kompanisë “Albanian Land Development”, ku figuron si administrator, shërben si ndërlidhës me vëllezërit miliarderë nga Katari, Ramez dhe Mohamad Al-Khayyat, të cilët investojnë së bashku me dhëndrin e Donald Trump, Jared Kushner.
