Nga kishat te qendrat tregtare, godinat e braktisura në Britani po kthehen në ferma gjigante kanabisi. Këtë herë, në zemër të Slough, policia zbuloi rreth 1,700 bimë në një ish-dyqan të BHS, ndërsa dy shqiptarë përfunduan pas hekurave.
Operacioni u zbulua më 28 janar, kur policia hyri me forcë në ish-godinën e British Home Stores (BHS) në Slough, Berkshire. Ajo që nga jashtë dukej si një ndërtesë e braktisur, brenda ishte shndërruar në një fermë të mirëorganizuar kanabisi, të shtrirë në dy kate.
Efektivët gjetën rreth 1,700 bimë kanabisi, në faza të ndryshme rritjeje. Sipas përllogaritjeve të policisë, ato mund të prodhonin rreth 150 kilogramë kanabis, me një vlerë të mundshme në tregun e rrugës prej afro 1.3 milionë paundësh. Vlera me shumicë përllogaritej në rreth 525 mijë paund.
Brenda ish-qendrës tregtare ishte ngritur e gjithë infrastruktura e nevojshme për kultivimin në shkallë të gjerë: ndriçim artificial, sisteme ngrohjeje dhe ventilimi, si dhe ambiente të përshtatura posaçërisht për bimët. Policia gjeti gjithashtu hapësira banimi me krevate, divan, kuzhinë dhe pajisje të tjera për personat që kujdeseshin për fermën.
Në pranga përfunduan Ajet Begu, 40 vjeç, nga Palmers Green në Londër, dhe Arjan Turja, 27 vjeç, pa adresë të përhershme. Ata u arrestuan më 28 janar dhe dy ditë më vonë u akuzuan për prodhimin e një droge të kontrolluar të klasit B.
Të dy pranuan fajësinë dhe më 21 gusht u dënuan në Reading Crown Court me nga 1 vit e 2 muaj burg.
Detektivi George Randell e cilësoi goditjen si një ndërhyrje të rëndësishme ndaj furnizimit me kanabis në Slough. Hetuesit po shqyrtojnë gjithashtu nëse ferma kishte lidhje me rrjete më të gjera të krimit të organizuar.
Ish-dyqani i BHS ishte mbyllur që në vitin 2016, pas falimentimit të kompanisë. Por rasti i Slough nuk është i vetmi ku një godinë e braktisur është kthyer në një fabrikë droge.
Më herët, policia britanike kishte zbuluar 960 bimë kanabisi në një ish-bankë Barclays në Clacton, ndërsa një tjetër fermë ishte ngritur brenda ish-kishës St Mary’s në Nelson, një godinë historike e vitit 1879. Atje u gjetën më shumë se 1,500 bimë kanabisi.
Nga një kishë 150-vjeçare te një ish-qendër tregtare: fermat e kanabisit po fshihen pas godinave që nga jashtë duken të braktisura, por brenda funksionojnë si fabrika droge.
