Një shqiptar 39-vjeçar është arrestuar nga karabinierët italianë në provincën e Monzës, pasi dokumentet e identitetit që kishte harruar në një automjet ndihmuan policinë ta identifikonte pas një tentative vjedhjeje. Disa ditë më vonë, ai u kap me bizhuteri, ora dhe sende luksoze me vlerë rreth 35 mijë euro, të cilat dyshohet se ishin vjedhur nga një banesë.
39-vjeçari, me origjinë shqiptare u arrestua më 11 tetor në Varedo, ndërsa drejtonte një automjet që ishte sinjalizuar si i përdorur në një vjedhje të kryer pak më parë në Limbiate.
Gjatë kontrollit të makinës, policia zbuloi bizhuteri ari, ora, para të gatshme dhe aksesorë veshjesh të markave të njohura, me një vlerë të përgjithshme prej rreth 35 mijë eurosh. Sendet u identifikuan dhe iu kthyen pronarit të ligjshëm.
Por historia e arrestimit kishte nisur tri ditë më herët, më 8 tetor, kur një telefonatë në numrin e emergjencës 112 sinjalizoi lëvizje të dyshimta pranë një vile në rrugën Francesco De Sanctis, në Lentate sul Seveso.
Policia mbërriti menjëherë dhe befasoi dy personat të dyshuar për tentativë vjedhjeje. Njëri prej tyre, një 23-vjeçar, tentoi të largohej me makinë, por u ndalua nga policia.
Ndërkohë, shqiptari 39-vjeçar, i cili dyshohet se kishte hyrë në banesë pasi kishte thyer një dritare, arriti të largohej në këmbë, duke humbur përkohësisht gjurmët.
Megjithatë, gjatë kontrollit të automjetit, policia zbuloi mjete për hapjen me forcë të dyerve dhe dritareve, përfshirë një pajisje prerëse, si edhe pesë varëse argjendi, tri palë vathë, dy ora burrash, syze luksoze dhe 180 euro.
Mes sendeve të gjetura ndodheshin edhe dokumentet e identitetit të shqiptarit 39-vjeçar. Kjo u mundësoi hetuesve të identifikonin personin që ishte larguar nga vendngjarja.
Fillimisht, ndaj tij u bë kallëzim në gjendje të lirë, pasi nuk ishte arritur të lokalizohej.
Arratisja përfundoi pasditen e 11 tetorit. Përveç sendeve me vlerë 35 mijë euro, në automjet u sekuestruan edhe një maskë që mbulonte fytyrën dhe mjete të tjera që dyshohet se përdoreshin për vjedhje.
Pas arrestimit, shqiptari u dërgua në burgun e Monzës, në dispozicion të autoriteteve gjyqësore.
Ndërkohë, 23-vjeçari i ndaluar gjatë ndërhyrjes së parë u paraqit në gjykatë me procedurë të përshpejtuar. Ndaj tij u vendos detyrimi për t’u paraqitur pranë policisë gjyqësore.
Shqiptari 39-vjeçar dyshohet për tentativën e vjedhjes në Lentate sul Seveso dhe për një tjetër vjedhje të kryer në Limbiate. Identiteti i tij nuk është publikuar nga media italiane.
