Një shqiptar 35-vjeçar është dënuar me 15 vite e 4 muaj burg nga Gjykata e Arezzos në Itali, për vrasjen me armë zjarri të bashkëkombësit të tij.
Sipas gazetës italiane La Nazione, Edison Beluli u shpall fajtor për vrasjen e 29-vjeçarit Gjergj Pergegaj, ngjarje e ndodhur më 20 mars 2026, përpara një picerie në zonën Olmo, pranë Arezzos.
Hetimet zbuluan se dy shqiptarët njiheshin prej kohësh dhe kishin punuar së bashku në ndërtim. Dyshohet se konflikti mes tyre kishte lindur për motive xhelozie, lidhur me një grua.
Sipas rindërtimit të ngjarjes, Beluli mbërriti me automjet dhe qëlloi katër herë me pistoletë. Dy plumba goditën viktimën në qafë dhe kraharor, duke i shkaktuar vdekjen.
Zhvillimi i ri: Gjykata përjashtoi rrethanën rënduese të paramendimit. Për shkak të gjykimit të shkurtuar, dënimi u ul me një të tretën, duke përfunduar në 15 vite e 4 muaj burg.
