Organizatat kërkojnë hetim të pavarur për pretendimet mbi përdorimin e tepruar të forcës nga policia, ndalimet arbitrare dhe sulmet ndaj gazetarëve gjatë protestave studentore në Shqipëri.
Në një deklaratë të përbashkët të publikuar më 23 tetor, Federata Ndërkombëtare e Gazetarëve dhe 44 organizata të tjera ndërkombëtare, evropiane dhe shqiptare shprehën shqetësim për situatën e të drejtave themelore pas protestave që nisën më 13 tetor.
Organizatat evidentojnë raportime për keqtrajtim, ndalime arbitrare, shkelje të të drejtave të fëmijëve, sulme ndaj gazetarëve dhe deklarata politike kërcënuese.
Ato theksojnë se dhuna ndaj policisë dhe dëmtimi i pronës duhen dënuar, por nuk mund të justifikojnë përdorimin joproporcional të forcës, ndalimet arbitrare apo ndëshkimin kolektiv.
Nënshkruesit i kërkojnë autoriteteve shqiptare hetime të shpejta, të paanshme dhe efektive, garantimin e së drejtës për tubim paqësor dhe mbrojtjen e gazetarëve e të fëmijëve. Kërkojnë gjithashtu mbikëqyrje parlamentare dhe reagim nga institucionet evropiane.
Deklarata pasqyron shqetësimet dhe informacionet e dokumentuara deri në mëngjesin e 21 tetorit 2026. Pretendimet e përmendura nuk përbëjnë vetvetiu konstatime përfundimtare të shkeljeve.
